Në një intervistë për edicionin e sotëm të “Corriere dello Sport”, ish-qendërmbrojtësi i Interit, Andrea Ranocchia, ka folur për trajnerin e Juventusit, Thiago Motta, me të cilin ka qenë shok skuadre te zikaltrit:

"Kam luajtur me të dhe më ndihmoi shumë në përshtatjen time. Një futbollist jashtëzakonisht inteligjent, gjithmonë i pozicionuar mirë, bënte gjënë e duhur në momentin e duhur, me një cilësi të pabesueshme".

Ish-mbrojtësi ka zbuluar gjithashtu një nofkë që Motta i kishte vënë: "Më quante ‘Jonny Stecchino’, sepse isha shumë i dobët. Nuk e mendoja që do bëhej trajner, sepse është një tip introvert. Në Bologna bëri një punë të shkëlqyer, një mrekulli, por kalimi nga Bologna te Juventusi është një hap i madh. Duhet pak kohë për t’u përshtatur. Mendoj se më kishte përzemër, për vite me radhë kemi shkëmbyer mesazhe, edhe kur ishte te PSG".

Ranocchia u ndal sërish te kalimi i Mottës te Juventusi si trajner: "Atje duhet të fitosh, të fitosh dhe përsëri të fitosh. Këtë e kërkon historia e klubit bardhezi. Juventusi nuk ndryshon, është ai që të ndryshon ty. Unë ende nuk e kam kuptuar cili është projekti i kësaj skuadre, çfarë ose kush i ka shtyrë të bëjnë atë merkato dhe ku duan të arrijnë. Te Juve duhen njerëz me ADN-në e Juves. Thiago është i veçantë, shpresoj t’i jepet koha dhe lojtarët e duhur".