Tiranë, 13 shkurt 2025 – Policia e Tiranës ka vënë në pranga një 34-vjeçar me precedent kriminal në fushën e armëmbajtjes pa leje, pas një aksioni për kapjen e tij. Ai është identifikuar si Klajdi Buza, dhe gjatë operacionit ka qëlluar me armë drejt punonjësve të Policisë, ndërkohë që ata ishin në tentativë për ta ndaluar në subjektin e tij privat në Rinas.

Sipas njoftimit të Policisë, gjatë ndalimit, shtetasi Klajdi Buza ka qëlluar nga brenda lokalit, por fatmirësisht nuk ka pasur të lënduar. Shërbimet e Policisë kanë arritur të neutralizojnë dhe shoqërojnë të riun për në ambientet e Drejtorisë së Policisë së Tiranës.

Në përfundim të veprimeve, specialistët për Hetimin e Krimeve të Rënda kanë arrestuar Klajdi Buza, dhe gjatë kontrollit janë sekuestruar arma e zjarrit dhe municion luftarak.

Materialet i kaluan Prokurorisë për veprime të mëtejshme procedurale, ndërsa hetimet për këtë ngjarje vijojnë. Njoftimi i Policisë:

Qëlloi drejt Punonjësve të Policisë, gjatë një aksioni policor për kapjen e tij, vihet në pranga 34-vjeçari.

34-vjeçari me precendent kriminal në fushën e armëmbajtjes pa leje.

Sekuestrohen arma e zjarrit dhe municion luftarak.

Shërbimet e Forcës Operacionale të DVP Tiranë pasi kanë marrë informacion për një shtetas i cili mbante armë zjarri në subjektin e tij kanë organizuar punën me qëllim kapjen dhe vënien përpara përgjegjesisë ligjore.

Gjatë ndalimit të shërbimeve të Policisë në subjektin e tij privat në Rinas, shtetasi i identifikuar me inicialet K. B, ka qëlluar në drejtim të Policisë nga brenda subjektit të tij.

Nga të shtënat nuk ka patur të lënduar.

Shërbimet e Policisë kanë bërë të mundur neutralizimin e tij dhe shoqërimin për në ambientet e DVP Tiranë.

Në përfundim të veprimeve specialistët për Hetimin e Krimeve të Rënda kanë bërë arrestimin e shtetasit K. B., 34 vjeç, banues në Tiranë.

Në cilësinë e provës materiale u sekuestrua arma e zjarrit dhe municion luftarak.

Materialet i kaluan Prokurorisë, për veprime të mëtejshme procedurale.