Në seancën maratonë që u zhvillua në Gjykatën e Posaçme të Shkallës së Parë për Krimet e Rënda (GJKKO), avokatët mbrojtës të Erion Veliajt kanë paraqitur kërkesën për garanci pasurore, duke kërkuar që klienti i tyre të vijojë hetimet në liri. Gjithashtu, ata kërkuan që ndaj bashkëshortes së tij, Ajola Xoxës, të vendoset masa e "detyrimit të paraqitjes", një masë më e lehtë që do të mundësonte lirinë e saj, për shkak të angazhimeve familjare, pasi ajo është nënë e një fëmije të vogël.

Kërkesa për garanci pasurore për Veliajn, i cili aktualisht ushtron funksionin e kryebashkiakut të Tiranës, synon t’i mundësojë atij hetimin në liri dhe rikthimin në detyrën e tij. Gjyqtarët e trupës gjykuese janë tërhequr për të shqyrtuar kërkesat dhe pritet një vendim në lidhje me masat e sigurisë ndaj të dyshuarve.

Ky është një moment kyç në procesin hetimor dhe gjyqësor, ku do të përcaktohet nëse do të miratohet kërkesa për lirinë e Veliajt dhe masat e tjera për Xoxën, duke marrë parasysh rrethanat personale dhe ligjore të të dyve.