Tiranë, 12 Shkurt 2025 – Seanca për kryebashkiakun Erion Veliaj në Gjykatën e Posaçme kundër Korrupsionit dhe Krimit të Organizuar (GJKKO) është ndërprerë pasi avokati i Veliajt kërkoi kohë për të njohur me dosjen. Seanca, e cila ishte planifikuar të niste në orën 08:30, pati një vonesë prej 30 minutash për shkak të ndërprerjes së energjisë elektrike në GJKKO dhe u shty për në orën 13:30.

Në të njëjtën seancë janë të pranishëm edhe biznesmeni Elman Abule, i dyshuar për pastrim parash, si dhe pesë të tjerë që janë vënë në detyrim paraqitje: Gentian Sula, Fatmir Bektashi, Meriman Palushi, Sokol Kryeziu dhe Shkëlqim Fusha.

Kryebashkiaku Erion Veliaj u arrestua më 10 shkurt nga zyrtarët e SPAK dhe BKH gjatë një operacioni në Bashkinë e Tiranës. Gjykata e Posaçme ka lëshuar 5 masa sigurie në kuadër të hetimeve ndaj Veliajt, ndërsa për bashkëshorten e tij, Ajola Xoxa, është caktuar masa e sigurisë "arrest në shtëpi".

Po ashtu, Gentian Sula, Meriman Palushi, Fatmir Bektashi, Sokol Kryeziu dhe Shkëlqim Fusha janë vënë në detyrim paraqitje.

Çfarë ka ndodhur më parë?

Në mëngjesin e 6 dhjetorit, oficerët e policisë gjyqësore, me urdhër të Gjykatës së Posaçme, kanë ushtruar kontrolle në zyrat e kompanisë së bashkëshortes së Veliajt, ndërsa më parë kanë sekuestruar telefonin celular të saj. Po ashtu, janë kryer kontrolle dhe në banesën e vëllait të kryebashkiakut.

Prokuroria e Posaçme ka nisur një hetim pasuror ndaj Veliajt, duke shqyrtuar rolin e tij në rastin e inceneratorëve të Tiranës dhe në çështjen e kompanisë "5D", të cilën e kishin drejtuar ish-drejtorët e Bashkisë. Veliaj ka reaguar duke shprehur mbështetje për hetimet e Prokurorisë.