"Më pëlqeu rezultati. Brest është një ekip që na ka shënuar 8 gola në 5 ndeshjet e fundit, soliditeti ynë më kënaqi". Këto janë fjalët e Luis Enrique, i kënaqur padyshim pas fitores 3-0 ndaj Brestit në shtëpi, në “play off”-in e Ligës së Kampionëve.

PSG-ja e tij e ka tashmë një këmbë e gjysmë në raundin tjetër (1/8 finale) të Ligës së Kampionëve, edhe pse ndeshja e kthimit duhet të luhet ende. Megjithatë, në konferencën për shtyp pas ndeshjes, trajneri parizien zbuloi se cila ishte pika e kthesës së skuadrës së tij:

"Ka një rregullsi që do të thotë se skuadra po përmirësohet. Bresti na bëri të vuajmë, por ne u mbrojtëm mirë. Skuadra jonë është e ndërtuar për të sulmuar. Jemi në një seri shumë pozitive rezultatesh, por ndeshja kundër Manchester Cityt i çliroi të gjithë.

Niveli i besimit te PSG është shumë i lartë, por nuk bëhet fjalë për t’iu qasur ndeshjes së kthimit kundër Brestit sikur të ishte stërvitje. Në pesë ndeshjet e fundit kundër tyre, dy herë që ishim dy gola përpara, na barazuan. Qëllimi është të kalojmë në 1/8 finale duke e fituar edhe ndeshjen e kthimit. Kjo është ajo që duam të bëjmë".