Prishtinë – Kryeministri i Kosovës, Albin Kurti, ka dërguar një letër Përfaqësueses së Lartë për Punët e Jashtme dhe Politikën e Sigurisë të Komisionit Evropian, Kaja Kallas, duke denoncuar diskriminimin sistematik që Serbia po i bën shqiptarëve në Luginën e Preshevës.

Kurti ka theksuar se shqiptarët e Luginës përballen me shtypje të vazhdueshme nga regjimi serb, përmes politikave që cenojnë të drejtat e tyre politike, ekonomike, kulturore dhe identitare.

Në letrën e tij, Kurti ka ngritur shqetësime të mëdha për mungesën e përfaqësimit të shqiptarëve në institucionet publike, shëndetësore dhe juridike të Serbisë, si dhe për kufizimet e arsimimit në gjuhën shqipe.

Ai gjithashtu ka theksuar se mbi 10% e shqiptarëve janë fshirë nga listat e votuesve, duke i mohuar kështu të drejtën themelore të votës.

Nivelet e papunësisë në këto zona variojnë nga 30% deri në 70%, shumë më të larta se mesatarja kombëtare e Serbisë prej 12%.

Kurti ka bërë të ditur se Serbia ka ngritur 48 baza ushtarake pranë kufirit me Kosovën, dhe ka caktuar shërbimin e detyrueshëm ushtarak, duke e konsideruar këtë një kërcënim serioz për shqiptarët e Luginës dhe një përpjekje për të shkaktuar shpërngulje masive.

Sipas tij, ky represion dhe kërcënimet e vazhdueshme janë të papranueshme dhe kanë për qëllim frikësimin dhe shtypjen e komunitetit shqiptar.

Postimi i Kurtit:

"Ndërkohë që në Kosovë komuniteti serb gëzon të drejta dhe liri, shqiptarët e Luginës së Preshevës përballen çdo ditë me diskriminim sistematik, pasivizim të adresave dhe spastrim etnik administrativ. Shqiptarët në Serbi janë të papërfaqësuar në institucione publike dhe ato shëndetësore e juridike, nuk iu ofrohen shërbimet të cilat iu takojnë, iu mohohet arsimimi në gjuhën e tyre, nuk iu njihen diplomat e nuk kanë të drejta dhe liri themelore," ka shkruar Kurti në postimin e tij.

Ai gjithashtu ka denoncuar diskriminimin në sektorët e shëndetësisë dhe administratës, duke theksuar se në spitalin rajonal në Vranjë, nga mbi 1000 punonjës, vetëm dy janë shqiptarë, dhe në Medvegjë, nga rreth 2000 punonjës komunalë, vetëm 12 janë shqiptarë.

Kurti ka shtuar se "Gjuha e urrejtjes ndaj shqiptarëve përkrahet nga shteti atje," duke theksuar se simbolika kombëtare shqiptare është e ndaluar dhe se nuk ka integrim, por terrorizim. Ai ka kërkuar veprime konkrete nga Bashkimin Evropian për të adresuar këtë situatë dhe për të garantuar të drejtat e shqiptarëve në Luginën e Preshevës.

"Represioni i vazhdueshëm dhe sistematik i komunitetit shqiptar në Luginën e Preshevës është në kundërshtim me vlerat evropiane dhe demokratike. Aktet dhe veprimet e Serbisë ndaj shqiptarëve të Luginës janë antiteza e parimeve të demokracisë, të drejtave të njeriut dhe sundimit të ligjit dhe kërkojnë reagim urgjent nga Bashkimi Evropian dhe bashkësia ndërkombëtare," ka përfunduar Kurti.