Prishtinë- Një ditë pas zgjedhjeve parlamentare, kryetari i Aleancës për Ardhmërinë e Kosovës (AAK), Ramush Haradinaj, ka mbajtur një konferencë për shtyp ku ka shprehur pakënaqësinë e tij me rezultatin e votimeve të 9 shkurtit.

"Edhe pse rezultatet preliminare janë publikuar dhe kemi mbi 90% të votave të numëruara, duke përfshirë votat e diasporës dhe ato me kusht, pranoj se rezultati nuk është ai që dëshironim. Nuk jam i kënaqur dhe kjo na bën të reflektojmë," u shpreh Haradinaj.

Pavarësisht rezultatit, ai theksoi se do të vijojë punën për krijimin e një qeverie opozitare, duke përjashtuar mundësinë e një koalicioni me Lëvizjen Vetëvendosje (LVV).

"Ne do të vazhdojmë këtë rrugëtim për t’i dhënë Kosovës një qeveri të re opozitare. Fakt është se opozita ka siguruar shumicën e votave krahasuar me partinë në pushtet, e cila pas katër viteve qeverisjeje nuk arriti të ruajë mbështetjen e saj," shtoi ai.

Haradinaj la të hapur mundësinë për bashkëpunim me partitë e tjera opozitare, duke theksuar se synimi i tij është një qeverisje e re që do të adresojë sfidat e vendit në mënyrë më efektive.