Goli i parë në derbin e Madridit për Kylian Mbappé, i cili në sfidën e luajtur kundër Atleticos i dha mundësinë Realit ta mbyllte ndeshjen me barazimin 1-1, duke gjetur rrugën e rrjetës në pjesën e dytë (pasi “Colchoneros” kaluan në avantazh me golin e Alvarez nga penalltia).

Pas ndeshjes, përmes një postimi në profilin e tij në Instagram, ylli francez e komentoi kështu sfidën: "Nuk ishte rezultati që donim, por reagimi i ekipit ishte i madh. Duhet të vazhdojmë përpara. Një tjetër betejë na pret. Hala Madrid!"

Ndërkohë, Real Madridi nuk ka fare kohë për pushim, pas barazimit 1-1 në derbin kundër Atletico Madridit. Që të dielën në mëngjes, siç raporton “Marca”, madrilenët kanë nisur përgatitjet për ndeshjen ndaj Manchester City, e cila do të luhet të martën mbrëma. Bëhet fjalë për ndeshjen e parë të “play-off”-it në Ligën e Kampionëve.

Nuk ka zhvillime të reja nga “infermieria”, pasi katër lojtarët e padisponueshëm për derbin e Madridit (Militao, Carvajal, Alaba dhe Rudiger) nuk do të jenë në dispozicion as për sfidën europiane ndaj Manchester City. Atyre iu është bashkuar Luicas Vazquez, i dëmtuar dje.

I vetmi lajm pozitiv për Ancelottin është rikuperimi i plotë i Eduardo Camavinga. Mesfushori francez, i cili u rikthye në fushë në minutat e fundit të derbit, pas tri javësh jashtë për shkak të një dëmtimi muskulor, do të jetë gati për të startuar nga minuta e parë kundër ekipit të Guardiolës.