Tiranë, 10 Shkurt 2025 – Kryetari i Partisë Demokratike, Sali Berisha, ka prezantuar sot Christopher LaCivita si drejtues të fushatës elektorale të PD-së, duke theksuar se LaCivita do të jetë arkitekti i fitores së partisë në zgjedhjet e ardhshme. Berisha ka përmendur gjithashtu rolin kyç të LaCivita në fushatën që çoi në fitoren e presidentit amerikan Donald Trump në vitin 2016, duke e cilësuar si një nga ndihmësit më të rëndësishëm të kësaj fitoreje historike.

Në një fjalim para gazetarëve, Berisha theksoi se LaCivita është një figurë e njohur për përvojën e tij të suksesshme në politikën amerikane, veçanërisht për angazhimin e tij si bashkëkryetar i fushatës që mundi makinerinë propagandistike të medias dhe forcave opozitare për të rikthyer Trumpin në Shtëpinë e Bardhë. Ai përmendi gjithashtu ngjarjen historike të natës së shpalljes së fitores, kur LaCivita pati mundësinë të drejtohej kombit amerikan nga Mar-A-Lago, në krah të presidentit Trump.

"Christopher LaCivita është një nga arkitektët e një fushate të jashtëzakonshme, që e mundi propagandën dhe manipulimet e mediave. Ai e drejtoi fushatën që e bëri presidentin Trump të fitojë zemrat dhe mendjet e shumicës së qytetarëve amerikanë, duke shënuar një fitore të jashtëzakonshme në historinë e zgjedhjeve presidenciale amerikane", tha Berisha gjatë prezantimit.

Berisha përfundoi duke shprehur besimin e tij se LaCivita do të sjellë sukses të ngjashëm për PD-në në Shqipëri dhe do të luajë një rol kyç në fitoren e partisë më 11 maj, duke siguruar një fitorë të fuqishme dhe të drejtë për qytetarët shqiptarë.