FUSHË KRUJË – Policia e Krujës ka arrestuar një 41-vjeçar lidhur me vënien e tritolit në restorantin "Brazili" në Fushë Krujë mbrëmjen e 31 janarit 2025. Arrestimi ka ndodhur pas hetimeve të thelluara, ku është vënë në pranga shtetasi Mondi Topalli.

Nga hetimet ka rezultuar se Topalli është bashkëpunëtor i autorit kryesor të ngjarjes, shtetasit Mirgen Zalla. Ky i fundit dyshohet se ka vendosur lëndën plasëse në lokal dhe më pas është larguar nga vendi i ngjarjes me automjetin e Topallit.

Gjatë kontrollit të banesës së autorit të dyshuar, shërbimet e Policisë kanë sekuestruar një armë gjahu pa leje, një armë sportive dhe municion.

Njoftimi i Policisë:

Vijojnë hetimet intensive për zbardhjen dhe dokumentimin e plotë të ngjarjes, ku më 31 janar 2025, fasada e një lokali në Fushë Krujë u dëmtua nga lëndë plasëse. Policia ka identifikuar autorin kryesor, shtetasin Mirgen Zalla, dhe ka shpallur në kërkim për kapjen e tij.

Po ashtu, është kapur dhe arrestuar 41-vjeçari Mondi Topalli, i cili dyshohet se ka bashkëpunuar me Zallën. Gjatë hetimeve, janë sekuestruar armë dhe municione, dhe Policia ka intensifikuar operacionet për kapjen e autorit kryesor.

Materialet procedurale janë referuar në Prokurorinë e Tiranës për veprime të mëtejshme.