Në kuadër të zgjedhjeve parlamentare që po mbahen sot në Kosovë, në Prokurorinë Themelore të Mitrovicës janë paraqitur dy raste që kanë ngritur shqetësime lidhur me procesin e votimit.

Në shkollën "Musa Hoti" në Frashër të Mitrovicës, një qytetar ka nënshkruar gabimisht në vendin e një personi tjetër në fletëvotim. Sipas prokurorit Njazi Rexha, ky rast është konstatuar si një gabim teknik dhe është rregulluar me ndërhyrjen e komisionit zgjedhor.

Ndërkohë, në shkollën "Fazli Grajçevci" në Shipol të Mitrovicës, një person dyshohet se po posedonte fletushka të fotokopjuara dhe të zbrazëta, duke u përpjekur të udhëzonte votuesit se si të votonin. Sipas prokurorit Rexha, ky rast është aktualisht nën hetim.

Autoritetet po vijojnë monitorimin e procesit zgjedhor për të siguruar një votim të rregullt dhe transparent.