Sezoni i mirë deri tani me fanellën e Galatasaray ka konfirmuar, nëse kishte ende nevojë, vlerën e Victor Osimhen. Sulmuesi nigerian, autor i 17 golave dhe 5 asisteve në 22 ndeshje, mban lart vlerën e tij në treg dhe ky është sigurisht një lajm i mirë për Aurelio de Laurentiis, pasi nigeriani sigurisht që nuk do të kthehet te Napoli në fund të huazimit te klubi turk.

Kështu, është raportuar se ka ardhur një ofertë prej 80 milionë eurosh, por sulmuesi, protagonist i titullit të Serie A, të fituar dy vite më parë, ka vendosur ta refuzojë, pasi nuk dëshiron të largohet nga Europa. Siç raporton "Le Cronache di Napoli", propozimi është dërguar nga Al Ahli dhe është më i lartë se klauzola prej 75 milionë euro, e vlefshme vetëm për jashtë vendit.

Siç u tha, lojtari nuk është i bindur për t’u transferuar në “Saudi Pro League”, nga ku ka marrë më parë disa propozime. Po ashtu, për Osimhen është interesuar edhe Juventusi, por në këtë rast do të duhet të bisedohet direkt me presidentin De Laurentiis dhe gjërat mund të komplikohen.

Për klubet italiane, në fakt, nuk ka klauzolë dhe shumë mundësi që shuma për t’u paguar të jetë më e lartë. Një gjë është e sigurt: pas disa muajsh do të zbulohet destinacioni përfundimtar i Osimhen.