Hansi Flick tha pas fitores 5-0 ndaj Valencias në Kupën e Mbretit se po vijnë javë të vështira, ndaj të gjithë lojtarët duhet të tregojnë nivelin e tyre më të mirë. Ai u shpreh i kënaqur me lojtarët që hyjnë në ekip si zëvendësues dhe kontribuojnë me gola, duke veçuar Ferran Torres për “hat-trick”-un e tij dhe rikthimin pas një periudhe të vështirë.

Flick vlerësoi gjithashtu Pedrin, duke e quajtur “të pakrahasueshëm” dhe një nga më të mirët në pozicionin e tij. Gjermani u shpreh i lumtur për stabilitetin që portieri ‘Tek’ i jep ekipit dhe theksoi rëndësinë e mbajtjes së portës të paprekur.

Pavarësisht fitores së thellë, trajneri gjerman theksoi se ekipi duhet të mësojë të kursejë energji, veçanërisht me kalendarin e ngjeshur.

Në fund, Flick theksoi se Barcelona është një ekip i ri dhe i uritur për gola, siç tregon edhe numri i jashtëzakonshëm i 109 golave në 35 ndeshje:

Flick iu referua Ferran Torresit, autorit të tre golave ndaj Valencias: “Jam shumë i lumtur për Ferran, sepse shënoi tre gola. Është e pabesueshme, pasi ka kaluar periudha të vështira këtë sezon dhe të rikthehej në këtë mënyrë nuk ishte e lehtë”.

Lavdërime pati edhe për Pedrin: “Nuk mund ta krahasosh, është një lojtar i jashtëzakonshëm, një nga më të mirët në pozicionin e tij. Ai e shijon lojën, e shijon topin. Edhe kur është nën presion, e kërkon topin dhe luan për ekipin. Jam shumë i lumtur që e kam këtu dhe shpresoj të qëndrojë për shumë vite”.

Barcelona e tij nuk ndalet së shënuari: “Uria e këtij ekipi është të shkojë pas golit tjetër, të luajë me këtë ritëm. Tashmë nuk është më çështje se çfarë them unë, por se ky është një ekip i ri që gjithmonë kërkon të shënojë”.