Kryeministri i Kosovës, Albin Kurti, ka reaguar për herë të parë ndaj deklaratave të ish-emisarit amerikan për dialogun mes Kosovës dhe Serbisë, Richard Grenell. Kurti ka theksuar se marrëdhëniet e Kosovës me Shtetet e Bashkuara janë shumë të mira, duke përmendur bashkëpunimin e ngushtë në forcimin e Forcës së Sigurisë të Kosovës (FSK) dhe blerjen e armëve amerikane.

"Kosova ka pasur kurrë më mirë bashkëpunim me Shtetet e Bashkuara. Po blejmë helikopterë ‘Black Hawk’ dhe sisteme anti-tank Javelin. Grantin më të madh nga Amerika Kosova e ka marrë gjatë mandatit tim," ka thënë Kurti gjatë një intervistë për një televizion lokal në Istog, duke shtuar se ka pasur gjithmonë kritika dhe vërejtje, por që këto nuk e ndalojnë vendin në përpjekjet për të ecur përpara.

Këto komente vijnë pas një sulmi të ashpër nga Richard Grenell, i cili, pesë ditë para zgjedhjeve në Kosovë, e akuzoi Kurtin si një partner të pasigurt dhe të pabesueshëm. Në një postim në platformën "X", Grenell theksoi se veprimet e njëanshme të qeverisë Kurti po destabilizojnë rajonin dhe se komuniteti ndërkombëtar, përfshirë BE-në dhe NATO-n, është i bashkuar kundër tij.

Grenell e përshkroi Kurtin si të paqëndrueshëm dhe kritikoi qeverinë e tij për vendime që, sipas tij, po përkeqësojnë marrëdhëniet me SHBA-të dhe me partnerët ndërkombëtarë.

Qëndrimi i Grenell për kryeministrin e Kosovës është përcjellë edhe nga djali i ish-presidentit amerikan, Donald Trump Jr., duke intensifikuar përplasjet mes Kurtit dhe administratës Trump.