TIRANË- Detaje të reja dalin në lidhje me operacionin për goditjen e grupit kriminal që falsifikonin dokumentat amerikane dhe evropiane.

Mësohet se Krimi Ekonomik kishte një vit hetimesh që merrej me këtë grup kriminal, ndërkohë që sot ka arritur te arrestojë 6 persona.

Po ashtu burimet bëjnë me dije se dokumentet e falsifikuara për tu shitur prodhoheshin në Kosovë, ndërsa më pas silleshin në Shqipëri për tu shpërndarë.

Ndërkohë që pasaportat amerikane shiteshin me një çmim deri në 3000 euro, ndërsa dokumentet evropiane shiteshin nga 2000 deri në 2500 euro.

Operacioni “Njësia”/ Goditet grupi kriminal i falsifikimit të dokumenteve, arrestohen tre persona dhe ndalohen tre të tjerë

Tiranë – Një operacion i gjerë policor i koduar “Njësia”, i zhvilluar nga autoritetet shqiptare në bashkëpunim me Njësinë e Përbashkët të Investigimit me ShBA-në dhe Prokurorinë e Tiranës, ka çuar në goditjen e një grupi të strukturuar kriminal të angazhuar në falsifikimin e dokumenteve të identifikimit.

Si rezultat i hetimeve intensive, tre persona janë arrestuar, ndërsa tre të tjerë janë ndaluar me iniciativë nga autoritetet. Në pranga kanë rënë Kushtrim Doksani, 35 vjeç, banues në Tiranë; Kujtim Gilani, 57 vjeç, banues në Prizren; dhe Getoar Luzha, 28 vjeç, banues në Kaçanik. Ndërkohë, Kujtim Duka, 56 vjeç; Leonard Basha, 58 vjeç; dhe Erina Doksani, 20 vjeçe, të tre banues në Tiranë, janë ndaluar për hetime të mëtejshme.

Mënyra e veprimit të grupit kriminal

Sipas hetimeve të kryera, ky grup i organizuar kriminal falsifikonte pasaporta, karta identiteti dhe leje drejtimi, të cilat më pas i shiste tek persona që synonin të lëviznin ilegalisht drejt vendeve që kërkojnë viza.

Gjatë operacionit, u sekuestruan 15 dokumente të dyshuara si të falsifikuara, përfshirë:

3 pasaporta dhe 3 karta identiteti amerikane 2 pasaporta, 2 karta identiteti dhe 1 leje drejtimi italiane 1 pasaportë dhe 1 leje drejtimi angleze 1 leje drejtimi rumune 1 kartë identiteti shqiptare

Gjithashtu, si prova materiale u sekuestruan 7 celularë dhe 1 motomjet që dyshohet se përdoreshin për kryerjen e aktivitetit kriminal.

Hetimet dhe ndjekja ligjore

Materialet procedurale janë referuar Prokurorisë së Tiranës, e cila do të vijojë hetimet për zbardhjen e plotë të kësaj veprimtarie kriminale. Të arrestuarit dhe të ndaluarit do të përballen me akuzat për:

“Falsifikimi i dokumenteve” “Falsifikimi i letërnjoftimeve, i pasaportave ose i vizave” “Ndihma për kalim të paligjshëm të kufijve”

Policia e Shtetit vijon hetimet për identifikimin dhe arrestimin e personave të tjerë të përfshirë në këtë aktivitet të paligjshëm, si dhe për zbulimin e destinacionit final të dokumenteve të falsifikuara.