Një moment i pritur për 11 vite. Neymar Jr. e ka veshur sërish fanellën e Santos në sfidën e zhvilluar natën e kaluar kundër Botafogo SP, ndeshje e vlefshme për “Campeonato Paulista”. Ylli brazilian, ish-lojtar i Barcelonës dhe PSG-së, hyri në fushë në fillim të pjesës së dytë dhe i dha publikut shfaqje të klasit të lartë.

Para ndeshjes, sulmuesi i dha një goditje të fortë ish-trajnerit të tij, Jorge Jesus, i cili e kishte larguar nga projekti i Al Hilal: "Jam gati të luaj. Nuk kam 90 minuta, sepse kam qenë i lënduar për një kohë të gjatë.

Kalova një lëndim të rëndë; pastaj u ktheva dhe pësoj një lëndim tjetër. Jam stërvitur, por kisha nevojë të luaja, të ndihesha i lumtur. U zhgënjeva shumë nga ajo që nxori nga goja Jorge Jesus, kur tha se nuk isha në të njëjtin nivel me shokët e skuadrës".

Neymar shtoi: "Në stërvitje ishte krejtësisht ndryshe, kam treguar se jam në formë për të luajtur, ashtu siç ishin edhe lojtarët e tjerë. Nuk më pëlqen të flas për këtë, të krijoj polemika, por kjo është e vërteta. E dija që mund të provoja se ai gabonte. Fusha flet dhe është vendi i vetëm ku mund ta mbroj veten nga të gjitha kritikat, nga gjithçka që njerëzit mendojnë për mua".