Shkodër/ I kërkuari për plagosje lëvizte i armatosur në rrugë, arrestohet nga policia

Shkodër – Një 22-vjeçar i identifikuar si Ensi Shtubina është arrestuar në flagrancë nga policia, pasi u kap duke lëvizur i armatosur me një pistoletë në qytet.

I riu ishte në kërkim për një ngjarje kriminale të ndodhur më 23 dhjetor 2024, kur ka plagosur një 24-vjeçar pas një konflikti të çastit në lagjen “Skënderbeg”.

Operacioni policor i koduar “Kontigjenti” u zhvillua për të goditur individët me precedent kriminal që lëvizin të armatosur, duke parandaluar ngjarje të rënda në qytet.

Gjatë kontrolleve, policia gjeti dhe sekuestroi një pistoletë me municion, që i dyshuari mbante me vete në mënyrë të paligjshme.

Nga verifikimet rezultoi se Ensi Shtubina kishte një masë sigurie aktive “Arrest në burg”, për shkak të përfshirjes në plagosjen e ndodhur disa muaj më parë.

Operacioni ishte pjesë e intensifikimit të kontrolleve policore në të gjithë qarkun e Shkodrës, me qëllim parandalimin e ngjarjeve kriminale dhe rritjen e sigurisë publike. Materialet procedurale i kaluan Prokurorisë së Shkodrës, e cila do të vijojë hetimet për zbardhjen e plotë të rastit.