Iu gjet kanabis në automjetin që e drejtonte pa leje: Arrestohet i riu në Kukës

Një 21-vjeçar, banues në Angli, ka rënë në prangat e Policisë së Kukësit, pasi u kap duke drejtuar një automjet pa leje drejtimi dhe me një sasi lënde të dyshuar narkotike kanabis në brendësi të tij.

Burime zyrtare nga Drejtoria Vendore e Policisë Kukës bëjnë me dije se, gjatë kontrollit të mjetit që drejtohej nga shtetasi I. K., shërbimet e Policisë kanë zbuluar një sasi lënde të dyshuar kanabis, e cila u sekuestrua në cilësinë e provës materiale.

Pas verifikimeve të kryera rezultoi gjithashtu se i riu nuk dispononte leje drejtimi, raporton noa.al.

Ai u arrestua në flagrancë nga Specialistët për Hetimin e Narkotikëve, në bashkëpunim me Sektorin e Qarkullimit Rrugor të Policisë Kukës.

Materialet procedurale u referuan pranë Prokurorisë së Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.