Rama për “shtetin Bektashi”: Nuk sjell përçarje, do funksionojë në përputhje me Kushtetutën

Kryeministri Edi Rama ka komentuar live në rrjetet sociale idenë e krijimit të një “shteti Bektashi”, duke theksuar se ky entitet nuk do të ndikojë në përçarjen apo shpopullimin e vendit. Sipas Ramës, çdo nismë e tillë do të mbetet brenda territorit të Kryegjyshatës Bektashiane dhe do të respektojë dispozitat kushtetuese.

Gjatë bashkëbisedimit online, Rama deklaroi se numri i banorëve në Shqipëri nuk është në nivelet e alarmit, duke kundërshtuar zërat që e lidhnin këtë projekt me një “shpopullim” të mundshëm. “Ku do të krijohet ky shteti Bektashi? Aty tek ai territori i vetëm që ka, brenda të cilit janë më pak se 150 persona. Nuk kemi vetëm 1.5 milionë banorë, por 2.4 milionë, sipas regjistrimit të ri,” u shpreh kryeministri.

Ai nënvizoi se bëhet fjalë për një plan institucional, pa asnjë rrezik për stabilitetin kombëtar, dhe se do të vihet në zbatim vetëm nëse sigurohet përputhshmëria e plotë me ligjin dhe me Kushtetutën e Shqipërisë.

“O të marrsha të keqen. Po ku do krijohet ky shteti bektashi? Aty tek ai territori i vetëm që ka brenda, i ka apo s’i ka 150 veta, dyshoj shumë që i ka. Nuk kanë ngelur 1.5 milionë banorë. Janë 2.4 milionë banorë, u bë regjistrimi i popullsisë", tha Rama.