Në një intervistë për “Gazzetta dello Sport”, ish-mbrojtësi i Interit, Lucio, foli për repartin difensiv të zikaltërve, duke u ndalur veçanërisht te Stefan De Vrij:

"Momentet e vështira ndodhin edhe për lojtarët e mëdhenj, edhe De Vrij bën pjesë në këtë kategori. Është një mbrojtës i shkëlqyer, gjithmonë e kam thënë se e shoh veten tek ai. Isha i sigurt që duke luajtur me vazhdimësi do të kthehej në standardet e tij më të larta".

Në mbrojtjen zikaltër, holandezi është në shoqëri të mirë: "Po, Bastoni, Bisseck, Acerbi, bashkatdhetari im Carlos Augusto… Fatkeqësisht, nuk mund t’i ndjek të gjitha ndeshjet e Interit, por sa herë që e shoh duke luajtur, mbetem i impresionuar nga cilësia e mbrojtjes para Sommerit. Interi është një klub i madh dhe Inzaghi po drejton burra të vërtetë në stilin e Interit".

Sa gola mund të arrijnë Lautaro dhe Thuram: "Më shumë se 50, pa dyshim. Mbrojtja është forca e Interit, por pa një sulm të madh nuk mund të fitosh asgjë. Me Lautaro dhe Thuram kaq të vendosur dhe të frymëzuar, çdo objektiv është i mundur".

Çfarë mungon për të fituar gjithçka: "Kompaktësia, fryma e grupit dhe sakrifica. Me këto mund të arrish gjithçka. Dhe këto janë cilësi që këtij Interi nuk i mungojnë".

Më e vështirë është të mposhtësh Napolin apo të fitosh Champions League: "Të fitosh Champions League. Nuk ka asgjë më të ndërlikuar, e di shumë mirë këtë".