Mbrojtësi holandez i Interit, Stefan De Vrij, komentoi për “Sky Sport” barazimin e vonë 1-1, me golin e tij, ndaj Milanit në derbi: "Duam gjithmonë të fitojmë, edhe ndaj Milanit provuam, bëmë lojën tonë. Ata kaluan në avantazh në kundërsulm, ndërsa në pjesën e dytë kërkuam barazimin, të paktën morëm një pikë".

A do t’i ofrojë diçka (qerasje) Zalewskit për atë assist te goli i barazimit? Holandezi u përgjigj pa asnjë dilemë: "Po, po, menjëherë".

Holandezi shënoi golin vendimtar të barazimit në fund: "Ndodhi gjithçka. Goditëm 3 herë shtyllën, na anuluan 3 gola. Topi s’donte të hynte në rrjetë, por treguam forcë duke vazhduar të besonim dhe në fund e barazuam ndeshjen”.

A ka shije të veçantë goli në derbi: “Sigurisht, është një ndeshje shumë e rëndësishme për ne, për skuadrën dhe tifozët. Të shënosh është gjithmonë kënaqësi, por në derbi ka një shije akoma më të veçantë. Më vjen keq që nuk fituam, e kërkuam fitoren. Kur nuk mund të fitosh, të paktën mos humb”.

Sa e rëndësishme ishte kjo pikë: “Ndoshta tregon se Interi ka një mentalitet, që pak skuadra e kanë. Jemi një skuadër e fortë. Gjithmonë duam të fitojmë dhe sot morëm vetëm një barazim. Duhet të vazhdojmë të punojmë dhe të përmirësohemi. Do të provojmë të fitojmë çdo ndeshje”.