Hansi Flick u shfaq shumë i kënaqur me fitoren e ekipit të tij, veçanërisht pas humbjes së Real Madridit një natë më parë. Trajneri gjerman pranoi se kishte shumë presion mbi skuadrën e tij, por theksoi se u pa një version i shkëlqyer i Lamine Yamal. Ai gjithashtu shpjegoi se mjeku i ekipit e këshilloi që Gavi të mos vazhdonte lojën pas goditjes në kokë.

Ndeshja – "Ishte një ndeshje e vështirë, me shumë punë të palodhur. Ishte shumë e rëndësishme të merrnim tri pikët, sidomos duke marrë parasysh rezultatin e djeshëm të Real Madridit".

Pushimi mes pjesëve – "Ua tregova lojtarëve hapësirat ku duhej të sulmonim, rëndësinë e mbajtjes së pozicioneve, kërkimin e lidhjeve të mira dhe pasimeve të shkurtra. Pjesa e dytë ishte shumë më e mirë".

Lewandowski – "Jam i lumtur me skuadrën, tentuan të shënonim, por nuk ishte e lehtë, sepse kundërshtari u mbrojt shumë mirë. Ai është një numër 9 i shkëlqyer brenda zones. Ishte shumë e rëndësishme që Robert shënoi në një ndeshje kaq të komplikuar".

De Jong – "Pjesa e parë u ndërpre shpesh për shkak të dëmtimeve, kjo nuk ndihmoi në ruajtjen e ritmit të lojës. Mendova se kishim nevojë për më shumë shpejtësi. Ronald Araújo kishte një karton të verdhë. De Jong është mjaft i mirë me topin, ka besim dhe na ndihmon shumë".

Humbja e Real Madridit – "Sinqerisht, nuk e pashë ndeshjen e tyre mbrëmë. Është e vërtetë. Ditët e fundit kanë qenë stresuese dhe gjëja më e mirë ishte të shkoja për të fjetur. Të dielën në mëngjes e mora vesh përmes WhatsApp-it. Nuk më intereson situata e tyre, duhet të fokusohemi te vetja jonë. Ishte një ndeshje e vështirë, sepse Alavés mbrohet shumë mirë".

Derbi madrilen – "Atlético Madrid dhe Real Madrid janë skuadra fantastike, por ne duhet të bëjmë punën tonë. Jemi disa pikë prapa, duhet të fitojmë për t’iu bërë presion atyre. Vendimi më i mirë para ndeshjes me Alaves ishte të shkoja për të fjetur. Më intereson të përmirësoj performancën e ekipit tim, jo të shqetësohem shumë për Atlético dhe Real Madridin".

Beteja e titullit – "Situata jonë tani është më e mirë se më parë, por duhej patjetër të fitonim. Kishim shumë presion dhe mendoj se u përgjigjëm shumë mirë në pjesën e dytë. Alavés mbrohet shumë mirë, por bëmë një punë të mirë dhe e merituam fitoren".

Lamine Yamal, Messi dhe Maradona – "Nuk më pëlqejnë këto krahasime. Lamine është shumë i talentuar, një gjeni i futbollit. Ajo që ka bërë në disa momente të ndeshjes është e pabesueshme. Jam shumë i lumtur që luan për Barcelonën. Me vetëm 17 vite mbi supe po bën paraqitje fantastike në çdo ndeshje, përballë kundërshtarëve jo të lehtë. Më pëlqen shumë ky djalë".

Gjyqtarët – "Nuk më pëlqen të kthehem pas në kohë. Gjykimi nuk është punë e lehtë, kjo është e vetmja gjë që mund të them. Nuk do të flas kurrë për një arbiter, sepse nuk është gjë e mirë ta bëj këtë".

Eric García – "Asnjëherë nuk kemi menduar për largimin e tij. Ka një mentalitet të shkëlqyer, luan shumë mirë me topin. Ndaj Avalves mbrojti mirë, mund të luajë në disa pozicione të ndryshme. Përshtatet shumë mirë me ndryshimet e sistemit të lojës".