Një operacion i Policisë së Tiranës ka çuar në arrestimin në flagrancë të 74-vjeçarit Hekuran Gjoni, i cili pasditen e djeshme goditi me mjet prerës djalin e tij, Asim Gjoni duke i shkaktuar vdekjen.

Ngjarja tragjike ndodhi në një lagje të kryeqytetit, ku pas një konflikti të çastit për motive të dobëta, 74-vjeçari ka sulmuar të birin duke e plagosur rëndë.

Viktima u dërgua me urgjencë në spital, por nuk mundi t’u mbijetonte plagëve të marra.

Operacioni dhe arrestimi i autorit

Menjëherë pas marrjes së informacionit për ngjarjen, Specialistët për Hetimin e Krimeve të Rënda, në bashkëpunim me Komisariatin e Policisë Nr. 4, kanë ndërmarrë një aksion të menjëhershëm për kapjen e autorit.

Hekuran Gjoni u lokalizua dhe u arrestua në vendngjarje pa mundur të largohej.

Në cilësinë e provës materiale u sekuestrua arma e krimit, ndërsa materialet hetimore u referuan në Prokurori, ku ai do të përballet me akuzën për "Vrasje për shkak të marrëdhënieve familjare". /noa.al