Kreu i Partisë Demokratike, Sali Berisha, ka reaguar nga Gjermania mbi fjalimin e kryeministrit Edi Rama në Kuvendin Rinor të Partisë Socialiste.

Sipas Berishës, Rama përdori një gjuhë fyese ndaj opozitës për të fshehur atë që ai e cilëson si “damkosjen e tmerrshme” të kryeministrit si drejtues i një “narkoshteti kriminal”.

“Sot, Edi Rama në një llogore banale foli para të rinjve socialistë sikur të ishte i ati i tyre biologjik ose shpirtëror. Ai përdori të gjitha termat e marrë nga bota e tij shpirtërore për të anatemuar opozitën, me qëllim që të maskojë damkosjen e tij si kreu i organizatës kriminale të narkoshtetit të parë dhe të vetëm në Europë, Shqipërisë,” – deklaroi Berisha.

View this post on Instagram

A post shared by Agjencia Kombëtare e Lajmeve NOA (@noanews)

Ish-kryeministri e akuzoi Ramën se nuk foli për problemet reale të të rinjve, si punësimi dhe perspektiva e tyre në Shqipëri, por vetëm për opozitën. Sipas tij, qeveria e drejtuar nga Rama ka shkaktuar një “gjenocid ndaj të rinjve”, duke i detyruar rreth 600 mijë prej tyre të largohen nga vendi në dhjetë vitet e fundit.

“Para të rinjve, Edi Rama nuk tha një fjalë për punësimin e tyre, për ëndrrat e tyre. Në epokën e zhvillimeve të mëdha teknologjike, të dhënave ‘big data’, resë kompjuterike dhe inteligjencës artificiale, ai nuk shqipëroi një fjalë për Shqipërinë e nesërme. Përveç sharjeve dhe mbrojtjes së krimeve të tij, nuk u ofroi të rinjve asgjë, përveç largimit nga vendi,” – shtoi Berisha.

Në përfundim, ai ftoi të rinjtë shqiptarë të zgjedhin alternativën e Partisë Demokratike, e cila, sipas tij, garanton një të ardhme të ndritur në Shqipëri, të bazuar në zhvillimet teknologjike dhe punësim cilësor.

“Ftoj çdo të ri të ndjekë jo alternativën e një sharësi profesionist, por alternativën e Partisë Demokratike, që ofron mundësi të mëdha për ndërtimin e një të ardhmeje më të mirë në vendin tonë,” – përfundoi Berisha nga Gjermania. /noa.al