Një operacion i gjerë policor është finalizuar sot në Fier, ku autoritetet kanë arrestuar Dhimitraq Xhoku (Hoxhara), 30 vjeç, një shtetas i shpallur në kërkim ndërkombëtar për një vrasje të rëndë të ndodhur në Itali.

Ngjarja tragjike në Palermo

Më 4 qershor 2023, në një ngjarje të përgjakshme në Sicili, Dhimitraq Xhoku (Hoxhara), akuzohet se në bashkëpunim me persona të tjerë, ka qëlluar për vdekje me armë zjarri shtetasin S. R. dhe ka plagosur një tjetër person.

Kjo ngjarje tronditi komunitetin lokal dhe vuri në alarm autoritetet italiane, të cilat nisën menjëherë hetimet për identifikimin dhe kapjen e autorëve.

Pas hetimeve të kryera nga Gjykata e Palermos, më 12 gusht 2024, u lëshua një urdhër-arresti ndërkombëtar ndaj 30-vjeçarit shqiptar, duke e shpallur atë në kërkim ndërkombëtar për veprat penale “Vrasja me dashje”, “Plagosja” dhe “Armëmbajtja pa leje”.

Si u kap Dhimitraq Xhoku (Hoxhara) në Fier?

Pas shkëmbimit të informacionit mes Sektorit për Hetimin e Krimeve të Rënda në policinë Fier dhe Interpol Tiranës, policia shqiptare arriti të lokalizojë dhe të arrestojë Dhimitraq Xhokun (Hoxhara) në vendlindjen e tij, Levan, Fier.

Operacioni policor, i koduar “Palermo”, u zhvillua në fshehtësi të plotë për të shmangur çdo mundësi arratisjeje të të kërkuarit.

Pas arrestimit, Interpol Tirana ka nisur procedurat për ekstradimin e tij drejt Italisë, ku pritet të dalë përpara drejtësisë për akuzat e rënda që rëndojnë mbi të. /noa.al