Pista e merkatos Santiago Gimenez për Milanin tani duket një mundësi konkrete. Shorti i “play off”-eve të Ligës së Kampionëve, që do të vërë përballë pikërisht kuqezinjtë dhe holandezët, fillimisht e kishte komplikuar çështjen.

Në diskutim ishin 11 milionë eurot që Feyenoord do të përfitonte nëse kualifikohej në 1/8 finale, shumë e rëndësishme që i kishte bërë holandezët të refuzonin çdo ofertë nën 40 milionë euro për sulmuesin meksikan.

Nga ana e tij, Milan kishte ofruar 32 milionë euro, plus bonuse, të cilat duheshin përcaktuar, duke u mbështetur edhe te dëshira e vetë sulmuesit meksikan, i cili tashmë kishte një marrëveshje personale me kuqezinjtë.

Tani, palët janë afruar dhe ka shumë mundësi që marrëveshja të mbyllet pozitivisht. Gimenez do të përfaqësonte gjithashtu "dritën jeshile" për largimin e Morata-s, i cili është gati të kalojë te Galatasaray në formë huazimi, me të drejtën e blerjes për një shifër rreth 15 milionë euro.