SHBA – Trump nënshkruan urdhrin ekzekutiv për dëbimin masiv të emigrantëve të paligjshëm, mes tyre edhe shqiptarë

Rikthimi i Presidentit Donald Trump në Shtëpinë e Bardhë ka sjellë menjëherë një ndryshim të fortë në politikat e emigracionit, duke ndezur debate të ashpra në SHBA dhe në mbarë botën. Një nga veprimet e para të kreut të ri të shtetit ishte nënshkrimi i urdhrit ekzekutiv për dëbimin e emigrantëve të paligjshëm, i cilësuar si një nga aktet më të rëndësishme të mandatit të tij të ri.

Menjëherë pas betimit, presidenti Trump nisur zbatimin e planit të deportimit, me dhjetëra avionë ushtarakë C-17 që filluan të transportojnë emigrantët drejt vendeve të tyre të origjinës.

Sipas të dhënave të publikuara nga Zyra për Emigracionin dhe Zbatimin e Doganave (ICE), në mesin e 1.4 milionë emigrantëve të paligjshëm që kanë marrë urdhra përfundimtarë dëbimi, ndodhen edhe 1.874 shtetas shqiptarë.

Në dokumentin e ICE-së theksohet se këta shtetas shqiptarë figurojnë aktualisht në listën e personave me vendime të ekzekutueshme për largim, çka e rendit Shqipërinë në grupin e vendeve të mesme të prekur nga fushata e gjerë e deportimeve.

Emigrantët e përfshirë në këtë plan i përkasin kombësive të ndryshme, ndërsa autoritetet amerikane theksojnë se prioritet u jepet atyre që kanë shkelur ligjet e emigracionit, kanë hyrë pa dokumente ose janë dënuar për vepra penale.

Ky vendim i administratës Trump ka shkaktuar reagime të forta nga organizatat e të drejtave të njeriut dhe disa shtete partnere të SHBA-së, të cilat e konsiderojnë politikën e dëbimeve masive si tepër të ashpër dhe me pasoja të rënda humanitare.

Ndërkohë, Departamenti i Sigurisë Kombëtare (DHS) ka bërë të ditur se operacionet e deportimit do të zgjerohen në javët në vijim, ndërsa pritet që një pjesë e emigrantëve të kthehen në vendet e tyre përmes marrëveshjeve dypalëshe riatdhesimi të nënshkruara më herët nga SHBA.