"Lautaro Martinez? Ai ka kontratë edhe për 5 vite të tjera dhe do të qëndrojë gjatë me fanellën zikaltër". Kështu u shpreh Alejandro Camano, menaxheri i kapitenit të Interit, gjatë një interviste të dhënë për mikrofonët e “Radio Kiss Kiss Napoli”.

Duke folur për Napolin, ai shtoi: "Antonio Conte është një trajner i madh. Më kujtohet kur e dëshironte me ngulm Hakimin tek Interi, kur ai luante ende te Borussia Dortmund. Me atë trajner, Hakimi gjeti thelbin e lojës dhe arriti të shfaqte më së miri potencialin e vet".

Më pas foli edhe për Garnacho: "Ai është një lojtar shumë i ri. Nëna e tij është argjentinase, ndërsa babai spanjoll. Tek Atletico Madridi spikati për talentin, shpejtësinë dhe personalitetin e tij.

Më pas, Manchester United e bleu dhe ai u bë një lojtar i rëndësishëm. Lukaku është një futbollist i madh, ndërsa Garnacho është një lojtar plotësues, i cili përshtatet shumë mirë me Romelu. Conte di si t’i shfrytëzojë maksimalisht lojtarët e tij".