Lumturi maksimale për Hansi Flick, pas fitores së thellë 7-1 kundër Valencias. Skuadra e tij triumfoi me një performancë të jashtëzakonshme, duke shënuar shtatë gola ndaj ekipit nga “Mestalla”, dhe më në fund fitoi një ndeshje në Montjuïc pas tri humbjesh radhazi si vendas në La Liga.

Trajneri gjerman vendosi të bënte rotacione në ekipin e tij dhe vendimi doli të ishte perfekt: "Na duheshin lojtarë me këmbë të freskëta dhe të gjithë ishin të jashtëzakonshëm e shumë të përfshirë gjatë tërë ndeshjes. Më pëlqeu shumë mënyra se si skuadra hyri në fushë, shumë e fokusuar që në fillim".

Flick iu gëzua performancës së lojtarëve që zakonisht nuk aktivizohen rregullisht: "Nuk është problem për mua. Është mirë të mund të zgjedhësh mes kaq shumë lojtarësh cilësorë".

Një nga lojtarët më të spikatur ishte Fermín López. Dy gola dhe dy asistime nga andaluzi, i cili u shpall lojtari më i mirë i ndeshjes. "Bëri një paraqitje fantastike. Ishte i shkëlqyer me topin dhe gjithashtu në finalizim. E dua Fermín", – tha Flick, shumë i kënaqur me performancën e talentit të akademisë.

Trajneri i Barcelonës vlerësoi gjithashtu zgjedhjen e Szczesny si portier titullar: "Një javë me Szczesny si titullar, dy fitore. Një kundër Benfikës dhe një kundër Valencias. Është një situatë e vështirë për Iñaki Peña, por është diçka që e kemi diskutuar brenda klubit dhe kemi marrë këtë vendim".

Portieri polak duket se do të jetë zgjedhja kryesore nga tani e tutje, megjithëse ndaj Valencias shpëtoi nga një penallti falë ndërhyrjes së VAR-it.