“Ka përfunduar periudha pa gola, por unë përpiqem t’i vlerësoj paraqitjet në 360 gradë. Punoj çdo ditë për ekipin dhe bashkëlojtarët, pastaj kur vjen goli, ajo paraqitje është më e plotë”. Kështu u shpreh Lautaro Martinez, i cili i dhuroi Interit fitoren në fushën e Sparta Pragës.

“Sonte kthehem në shtëpi i lumtur, sepse goli im vlejti tri pikë thelbësore, – shtoi argjentinasi për “Sky Sport”, i zgjedhur MVP i ndeshjes. – Rekordi më bën të lumtur, ia dedikoj të gjithë familjes sime që po e shihte ndeshjen së bashku”.

Kapiteni zikaltër realizoi golin e tij të 14-të në Champions League, duke barazuar Adrianon si golashënuesin më të mirë të të gjitha kohërave të Interit në këtë kompeticion: “Jam krenar, e keqja është lënë pas krahëve. Ishte një ndeshje shumë e rëndësishme për rrugëtimin tonë në Champions.

Tani për 1/8-at mungon edhe një hap i vogël në ‘San Siro’ kundër Monaco. A na mungon pak ashpërsia? Ky është një aspekt që duhet ta përmirësojmë, kemi lënë pikë gjatë rrugës dhe sonte mund të ishte një nga ato ndeshje”.