Luajti 71 minuta ndaj Sparta Prague, ku startoi si titullar, në ndeshjen e shtatë të fazës së grupit të Champions League dhe mori vlerësime maksimale nga trajneri Simone Inzaghi për paraqitjen.

Mesfushori i kombëtares sonë kuqezi, Kristjan Asllani, foli për mediat zyrtare të klubit zikaltër, duke treguar emocionet e kësaj periudhe kur po zëvendëson Calhanoglu e dëmtuar, mes kritikave të mediave italiane dhe mbështetjes së bashkëlojtarëve e trajnerit:

"Duhej ta merrnim fitoren në shtëpi, sepse e dinim që ishte e rëndësishme. Tani na duhet vetëm një pikë për t’u kualifikuar në 1/8 finale. Ndeshja e sotme kërkonte shumë përqendrim, e poseduam shumë topin në pjesën e parë, me kundërshtarin që i mbyllte hapësirat mjaft mirë.

Në këto raste duhet të jesh i vetëdijshëm për kundërsulmet, ne bëmë shumë mirë në këtë aspekt. Jam i lumtur që mund të luaj dhe ta vesh këtë fanellë, jam i përqendruar te çdo ndeshje. Duhet të përgatitemi mirë për transfertën ndaj Lecce në kampionat, sepse do të jetë një ndeshje e vështirë".

Mesfushori kuqezi po luan me vazhdimësi në ndeshjet e fundit, në mungesë të turkut Calhanoglu: "Këto minuta më bëjnë shumë mirë, kam qëndruar gjatë në stol. Jam i lumtur që e vesh këtë fanellë, fokusohem te çdo ndeshje e vetme që luaj”.