Pas fitores 3-1 ndaj Empolit, mbrojtësi holandez Denzel Dumfries foli për suksesin që u arrit edhe falë një goli të tij me kokë, pas këndores së përpiktë nga Asllani. Ky gol erdhi pas avantazhi të parë të siguruar nga Lautaro Martinez, më pas goli i Marcus Thuram dhe ai i Empolit, nga ish-lojtari i Interit, Sebastiano Esposito.

Ja fjalët e Dumfries në intervistën për kanalin zyrtar të klubit zikaltër, pas ndeshjes: "Sa i përket golit, ishte një këndore e shkëlqyer nga Asllani, i cili është një lojtar i madh. Jam i lumtur që kam shënuar, kam punuar në këtë situatë gjatë stërvitjes dhe gjithmonë jam i lumtur të shënoj për Interin.

Pjesa e parë ishte e vështirë, sepse Empoli u mbyll dhe luajti shumë mirë në fazën mbrojtëse, duke i mbajtur të gjithë lojtarët pas vijës së topit. Për ne ishte e vështirë, por qëndruam të përqendruar dhe në fund morëm një fitore të madhe".