TIRANË – Një banesë e përshtatur për përgatitjen e dozave të kanabisit është zbuluar nga Policia në Tiranë dhe si rezultat është vënë në pranga një 23-vjeçar dhe është shpallur në kërkim një tjetër. Policia bën me dije se 23-vjeçari në bashkëpunim me personin e shpalur në kërkim siguronin lëndë narkotike e përgatisnin në doza brenda banesës dhe më pas e shisnin në lagjet e Tiranës.

Gjatë kontrollit në banesë policia ka gjetur dhe sekuestruar 5 kg lëndë të dyshuar narkotike kanabis dhe 2 pershore elektronike. Ndërkohë po në kuadër të këtij operacioni është arrestuar një 24-vjeçar turk pasi u kap në flagrancë me një sasi lënde narkotike kanabis që dyshohet se ia kishte blerë 23-vjeçarit.

Njoftimi i Policisë:

Zbulohet një banesë e përshtatur për përgatitjen e dozave të kanabisit. Sekuestrohen 5 kg lëndë narkotike kanabis dhe 2 peshore elektronike.

Vihet në pranga një 23-vjeçar, shpallet në kërkim 1 shtetas tjetër, bashkëpunëtorë për përgatitjen dhe shitjen e dozave të kanabisit.

Vihet në pranga dhe një shtetas turk, të cilit iu gjet një sasi lënde narkotike kanabis që dyshohet se ia kishte blerë 23-vjeçarit.

Specialistët e Seksionit për Hetimin e Narkotikëve të DVP Tiranë, në bashkëpunim me shërbimet e Komisariatit të Policisë Nr. 1, në vijim të punës për goditjen e veprimtarive kriminale në fushën e narkotikëve, kanë organizuar dhe finalizuar operacionin policor të koduar “Collaboration 1”.

Në kuadër të këtij operacioni, u arrestua në flagrancë shtetasi S. H., 23 vjeç, banues në Tiranë dhe u shpall në kërkim shtetasi Xh. B. Nga veprimet hetimore dyshohet se këta bashkëpunonin për sigurimin e lëndës narkotike, ndarjen e saj në doza dhe shitjen e tyre në qytetin e Tiranës.

Gjatë kontrollit në banesën e marrë me qira nga shtetasi Xh. B., shërbimet e Policisë kanë gjetur 5 kg lëndë të dyshuar narkotike kanabis dhe 2 pershore elektronike, që u sekuestruan në cilësinë e provës materiale.

Gjithashtu, në kuadër të këtij operacioni, u arrestua shtetasi B. S., 24 vjeç, banues në Turqi, pasi u kap në flagrancë me një sasi lënde narkotike kanabis që dyshohet se ia kishte blerë 23-vjeçarit.

Materialet procedurale i kaluan Prokurorisë, për veprime të mëtejshme.