Një zjarr i rëndë përfshiu një hotel në vendpushimin e skive Kartalkaya në provincën Bolu të Turqisë gjatë natës, duke shkaktuar humbjen e jetës së 10 personave dhe plagosjen e më shumë se 30 të tjerëve. Lajmi u konfirmua nga ministri i Brendshëm turk, Ali Gerlikaya, përmes rrjetit social “X”.

“Sot në orën 03:27 ka rënë zjarr në një hotel në Kartalkaya. Për fat të keq, numri i viktimave ka arritur në dhjetë dhe numri i të lënduarve në 32,” deklaroi ministri.

Sipas guvernatorit të Bolu-s, Abdulaziz Aydin, zjarri shpërtheu në katin e katërt të një hoteli 11-katësh, në zonën e restorantit. Në momentin e ngjarjes, në hotel ndodheshin 234 persona. Zjarrfikësit janë ende duke punuar për të shuar flakët, ndërsa shkaqet e zjarrit mbeten të paqarta. Hetimet janë në vijim.

Kjo tragjedi ka tronditur jo vetëm banorët e zonës, por edhe komunitetin më të gjerë, duke ngritur shqetësime mbi masat e sigurisë në objektet turistike në rajon.