Finalja e Superkupës Spanjolle, e humbur me rezultatin 5-2 kundër Barcelonës, ka nxjerrë në pah të gjitha dobësitë e “Los Blancos”, të cilët sezonin e kaluar fituan Champions League, La Liga-n dhe Superkupën. Një "shuplakë" e rëndë, ashtu si në “El Clásico” e kampionatit (4-0 në “Bernabeu”), e cila tani po bën që i gjithë Real Madridi të reflektojë.

Jorge Valdano, legjenda e merenguesve theksoi në “Movistar +” ngjashmëritë dhe dallimet midis dy ndeshjeve: "Diferenca kaq e madhe midis dy fitoreve të Barçës kundër Real Madridit në këtë sezon është e pabesueshme. Në kampionat, vendimtare ishin pozicionet jashtë loje, plot 12 të tilla. Këtë herë jo, por diferenca në rezultat ishte e ngjashme. Dy humbje krejtësisht të qarta".

Ndërkohë, sondazhi i gazetës “Marca” deri mbrëmë ishte i qartë. Kush mban më shumë faj për humbjen në Superkupën e Spanjës? Kjo ishte pyetja e gazetës së njohur sportive madrilene. Nga mbi 84 mijë votues, 59% fajësonin Ancelottin, sepse “plani i tij dhe skuadra nuk funksionuan”. Për 27%, faji ishte i lojtarëve për paraqitjet e tyre të dobëta, ndërsa 14% shihnin përgjegjës Florentino Perez, sepse skuadra nuk është mjaftueshëm cilësore.

Mund të humbasësh ndaj Barcelonës, por të mposhtesh 5-2 prej saj dhemb shumë. Sidomos meqë në fund të tetorit, në “Bernabeu”, Real Madridi kishte pësuar një humbje poshtëruese 4-0 ndaj katalanasve. Pa harruar edhe miqësoren e verës në New Jersey, një tjetër humbje 2-1. Për më tepër, është hera e parë në histori që blaugranat shënojnë të paktën nga 4 gola në dy “El Clasico” radhazi. Në thelb, ndjenja e pafuqisë e bëri dramatike sfidën e fundit në Jeddah.

Problemi, siç e përkufizon “Marca”, është “Kroositisi”. Largimi i Kroos këtë verë ka lënë një boshllëk të madh në mesfushë. Modric është 39 vjeç, ndaj kush mund të luajë si ‘regjisor’ i skuadrës së bardhë? Në verë, të gjithë u mahnitën nga ardhja e Mbappé, i cili ishte i vetmi lojtar për t’u lavdëruar ndaj Barcelonës të dielën, por mungonte “cerebro”, mendja që kontrollon lojën.