Tammy Abraham është konsideruar si një nga përgjegjësit kryesorë për mungesën e fitores së Milanit në ndeshjen kundër Cagliarit, të shtunën mbrëma në “San Siro”.

Sulmuesi anglez u aktivizua menjëherë pas barazimit të ekipit sard me qëllim për të shtuar forcat në sulmin kuqezi dhe çarë mbrojtjen e organizuar mirë nga kundërshtarët.

Gjithsesi, anglezi humbi dy raste të arta. Herën e parë gaboi praktikisht me portën bosh, duke gjuajtur mbi traversë, ndërsa të dytën me rrugën e hapur përpara portierit Caprile.

Pas përfundimit të ndeshjes, Abraham publikoi një “histori” në Instagram, ku bëri “mea culpa” për golat e humbur. Ja çfarë shkroi sulmuesi anglez: "Doja ta ndihmoja skuadrën time të merrte tri pikët, por sonte nuk ishte nata ime. Do të kthehemi më të fortë. Forca Milan!"