TIRANË- Një person i dënuar për vrasje në Gjermani është arrestuar nga policia e Tiranës, pasi mbante armë zjarri pa leje.

Arrestimi i shtetasit me iniciale V.K., u bë në kuadër të operacionit policor të koduar "Ekol". Pas kontrolleve në banesën e tij, policia ka gjetur dhe sekuestruar në cilësinë e provës materiale një armë zjarri pistoletë dhe municion luftarak.

NJOFTIMI I POLICISË:

DVP Tiranë

Vijojnë operacionet e njëpasnjëshme për goditjen e veprimtarisë kriminale në fushën e armëmbajtjes pa leje.

Finalizohet operacioni policor i koduar “Ekol“

Mbante armë zjarri dhe municion luftarak në banesë, arrestohet poseduesi i saj.

Komisariati i Policisë Nr.4, në bazë të informacioneve të siguruara në rrugë operative nga burime të ndryshme, finalizoi me sukses operacionin policor të koduar “Ekol ”, në kuadër të të cilit u bë kapja dhe arrestimi në flagrancë i shtetasit V. K., banues në Tiranë, i dënuar më parë për vrasje në shtetin Gjerman.

Nga ana e sherbimeve të Komisariatit të Policisë Nr.4, janë siguruar informacione nga inteligjenca policore, për një shtetas që mbante armë zjarri pa leje, në banesë.

Mbi bazën e këtyre informacioneve, falë veprimeve të shpejta dhe profesionale, shërbimet e Policisë kanë ushtruar kontroll në banesën e shtetasit V.K, dhe kanë gjetur dhe sekuestruar në cilësinë e provës materiale një armë zjarri pistoletë dhe municion luftarak.

Materialet proceduriale i kaluan Prokurorisë, për veprime të metejshme.