Jonathan Tah vazhdon të jetë në qendër të vëmendjes, mes spekulimeve për të ardhmen e tij dhe deklaratave që ndezin diskutimet. Kontrata e mbrojtësit qendror të Bayer Leverkusen përfundon në fund të sezonit, ndaj emri i tij po lidhet vazhdimisht me Barcelonën, e cila e sheh si një përforcim ideal për mbrojtjen.

Megjithatë, nuk mungojnë zërat për një transferim të mundshëm te Real Madridi, ku luan miku dhe shoku i tij i kombëtares, Antonio Rüdiger. Në një intervistë për “Goal”, Tah nuk pranoi të flasë për të ardhmen e tij, por shtoi se i vlerëson "lojërat me nervat" e kolegut të tij Rüdiger, i cili është i njohur për aftësinë e destabilizimit të kundërshtarëve:

“Gjithmonë ka gjëra për të mësuar. I vëzhgoj shumë kolegë për të parë se çfarë mund të bëj më mirë. Kur shoh Rüdiger dhe lojërat e tij me nervat e kundërshtarit, i vlerësoj. Janë një pengesë e madhe për çdo kundërshtar. Këto janë aspekte që mund t’i përshtas edhe unë në lojën time”.

Tah gjithashtu theksoi rëndësinë e këtyre strategjive psikologjike, duke shpjeguar sesi Rüdiger i përdor ato për të larguar vëmendjen e sulmuesve: “Nuk e imitoj, por e kuptoj sa të bezdisshme janë për një sulmues, kur ke dikë që të ndjek nga afër ose që të thotë diçka në vesh.

Toni e bën këtë në mënyrë të përsosur. Natyrisht, fillon t’i sjellësh këto elemente në lojën tënde. Nuk është se e kopjon, por kupton ndikimin e tyre dhe mendon: Ndoshta mund të bëj më shumë edhe unë”.