Ndërsa e fitoi betejën për regjistrimin e Dani Olmos dhe Pau Víctor, drejtuesit e Barcelonës po kërkojnë burime alternative të ardhurash, duke nxjerrë në ankand disa objekte historike të klubit.

Sipas një komunikate zyrtare nga klubi, kjo nismë është pjesë e planit për “memorabilia” të stadiumit “Camp Nou”, i cili po kalon fazën e fundit të punimeve të rikualifikimit. Objektet do të nxirren në shitje nga shtëpia e ankandit “Goldin”, duke filluar nga 23 janari në orën 10:00 dhe përfunduar më 13 shkurt në orën 04:00.

Ankandi, i hapur për të gjithë, do të përfshijë dollapët e përdorur nga lojtarët ndër vite, pikat e penalltive, flamujt e goditjeve nga këndi dhe stemat e klubit të vendosura para pankinave. Po ashtu, do të jenë në dispozicion fotografitë e skuadrave që kanë fituar pesë Champions League (1991-92, 2005-06, 2008-09, 2010-11, 2014-15), të cilat ishin të ekspozuara në dhomat e zhveshjes dhe tunelin e stadiumit. Në total, vetëm nga vlerat fillestare të ankandit, të gjitha objektet vlejnë rreth 1 milion euro.

Ndonjë referencë objektesh për shitje? Për të fituar dollapin e Messit, baza e ankandit është 350.000 dollarë. Për të tjerët, çmimet fillestare variojnë nga 100.000 dollarë (për dollapët e Maradonës, Guardiolës, Piqués dhe Ronaldinhos) deri në 2.500 dollarë për atë të përdorur nga Dembélé, tashmë te PSG. Pikat e penalltive kanë një vlerë minimale prej 5.000 dollarësh secila, ndërsa katër flamujt e këndit fillojnë nga 2.000 dollarë secili.