Wanda Nara ka konfirmuar zyrtarisht përfundimin e marrëdhënies së saj me këngëtarin argjentinas “L-Gante”. Në një intervistë për mediat argjentinase, biznesmenia dhe prezantuesja e njohur theksoi se vendimi për t’i dhënë fund romancës ishte i lidhur ngushtë me prioritetet e saj familjare.

"Duhet të mendoj për fëmijët e mi, – tha Wanda. – Ata janë gjëja më e rëndësishme në jetën time. Tani ndjej se duhet të përqendrohem më shumë te mirëqenia e tyre dhe te familja ime".

Lidhja mes Wanda Narës 38-vjeçare dhe “L-Gante” vetëm 23 vjeç ishte një nga temat më të përfolura në mediat argjentinase e ndërkombëtare. Romanca nisi në mënyrë të papritur, pas ndarjes së Wandës nga futbollisti Mauro Icardi. Marrëdhënia e saj me këngëtarin 23-vjeçar u shoqërua me polemika dhe spekulime, por të dy dukeshin të lumtur në daljet publike dhe postimet në rrjetet sociale.

Megjithatë, presioni mediatik dhe kritikat ndaj Wandës për ndikimin e kësaj lidhjeje te fëmijët e saj duket se kanë qenë faktorë të rëndësishëm në përfundimin e marrëdhënies.

Wanda Nara aktualisht po fokusohet te projektet e saj profesionale dhe te fëmijët, të cilët i ka me ish-partnerët Maxi López e Mauro Icardi. Këngëtari “L-Gante” ende nuk e ka komentuar publikisht ndarjen, duke i lënë ndjekësit në pritje të një reagimi.