Fali Ramadani, agjenti shqiptar i disa lojtarëve, përfshirë Federico Chiesa, ka sqaruar të ardhmen e klientit të tij italian, i cili verën e kaluar u largua nga Juventusi për të kaluar te Liverpool-i. Në javët e fundit, emri i tij është përfolur si rikthim te Fiorentina. Ja çfarë tha Ramadani për portalin “365scores”:

"Liverpool-i nuk ka asnjë qëllim të heqë dorë nga lojtari. Federico do të qëndrojë te Liverpool-i dhe po kërkon mundësinë për të luajtur në të ardhmen. Kjo është ajo që mund të konfirmoj tani për tani".

Ja dhe deklaratat e trajnerit të Liverpool-it, Arne Slot, më 19 dhjetor, për Chiesa: "Kur një lojtar ka qëndruar jashtë për pesë ose gjashtë muaj, është e kuptueshme që ka ulje dhe ngritje. Kam vërejtur disa momente shumë pozitive dhe të tjera ku mendoja: Ok, mund të bëjë më mirë se kaq.

Kjo është krejt normale kur luan ndeshjen e parë pas një mungese kaq të gjatë. Zakonisht, gjatë fazës parapërgatitore, një lojtar luan disa ndeshje për të gjetur ritmin. Federico ka qenë jashtë për një kohë të gjatë, ndaj rikthimi në formën më të mirë nuk është i lehtë. Megjithatë, ishte bukur të shihja disa shkëndija të cilësive të tij".

Në Firence, emri i Federico Chiesa ka filluar të përmendet si një mundësi merkatoje. Thuhet se ai mund të largohet nga Liverpool-i, ku nuk po gjen hapësira. Megjithatë, situata mbetet e vështirë për shkak të pagës së tij të lartë (7 milionë euro), që është jashtë mundësive të Fiorentinës.

Kujtojmë se largimi i tij nga Fiorentina drejt Juventusit nuk u prit mirë nga tifozët vjollcë, për shkak të rrethanave dhe mënyrës si ndodhi transferimi. Pavarësisht kësaj, nga pikëpamja teknike, Chiesa mbetet një lojtar i padiskutueshëm. Ndërkohë, klubi i Rocco Commisso, me drejtues si Daniele Pradè, ka ambicie të mëdha. Fiorentina dhe qyteti i Firences vazhdojnë të ëndërrojnë.