Historia ishte aty, vetëm një hap larg. Superkupa e gjashtë, e katërta radhazi me Interin, trofeu i shtatë me këtë klub, mundësia për të arritur Herrera dhe Mancini në krye të renditjes së trajnerëve më të suksesshëm në historinë e klubit. Gjithçka dukej gati: 1-0 në fund të pjesës së parë, dyfishimi i avantazhit disa sekonda pas nisjes së pjesës së dytë.

Megjithatë, më pas të gjitha u zhbënë. Inzaghi e shikon humbjen e finales së Superkupës së Italisë me dhimbje dhe tani është i ftuar të bëjë vlerësime të thella. "Është një humbje që djeg, është e dhimbshme, na lëndon.  Duhet t’i bëjmë komplimente Milanit, sepse nuk u dorëzua asnjëherë, por në aksionin e golit të 2-1 topi ishte te ne.

Duhej ta kontrollonim si duhet, edhe pse mund të kishte pasur faull për Asllanin. Më pas humbëm mundësinë për 3-1. Sidoqoftë, pavarësisht se dhemb shumë, kjo skuadër është ngritur gjithmonë. Shohim përpara, do të kemi 6 ndeshje në 18 ditë dhe do të duhet të rikthehemi në mënyrën më të mirë.

Në pjesën e parë, teknikisht mund ta menaxhonim më mirë topin, bëmë disa gabime të tepruara. Në pjesën e dytë, ndryshimet kishin ndikim te Milani, sepse u futën lojtarë më energjikë dhe shumë sulmues. Duhej ta menaxhonim më mirë situatën, në epërsinë 2-1 patëm rastin e shtyllës së Carlos dhe më pas topin e Frattesi, që u kthye te Dumfries. Është një humbje e dhimbshme, nga e cila mund të mësohet. Do të nxjerrim mësime, unë i pari, sepse është shumë e dhimbshme të humbasësh një finale me dy gola avantazh”.

Në Arabinë Saudite, skuadra zikaltër humbi jo vetëm Superkupën, por edhe dy lojtarë të rëndësishëm si Thuram dhe Calhanoglu: "Pa dyshim që janë shumë të rëndësishëm për ne. Në futboll ka lojtarë të pazëvendësueshëm, por nuk duhet të jetë rasti ynë. Duke luajtur çdo tri ditë, kemi nevojë për të gjithë. Tani presim që të rikthehen edhe mbrojtësit, të cilët do të na ndihmojnë. Të gjitha skuadrat luajnë shumë, duhet t’i alternojmë lojtarët për të shmangur humbjen e tyre".