Qytetarët shqiptarë pritet të kenë nga 1 shkurti 2025 e në vazhdim, çmime më të ulëta për energjinë elektrike që shpenzojnë.

Vendimi u paralajmërua nga qeveria gjatë vitit që lamë pas dhe aktualisht, është depozituar një kërkesë zyrtare për uljen e çmimit.

Kërkesa është dorëzuar nga Furnizuesi i Shërbimit Universal, degë e Operatorit të Shpërndarjes së Energjisë Elektrike që është pjesë e Korporatës Elektroenergjitike shqiptare.

Enti Rregullator i Energjisë Elektrike është duke shqyrtuar kërkesën dhe çmimi i ri pritet të dalë pas mbledhjes së bordit në ditët në vazhdim.

Mësohet se ulja e çmimit do të bëhet vetëm për abonentët familjarë.

Aktualisht shqiptarët paguajnë 11.4 lekë për kilovat, ku 9.5 lekë është vlera të cilës i shtohet tvsh 20 për qind.

Burimet në ministrinë e Infrastrukturës dhe Energjitisë bënë të ditur se bëhet fjalë për një ulje në kufijtë e 20 për qind, çka nënkupton heqjen e tvsh-së.

Ndryshimi vjen rreth 12 vjet pasi kryeministri Edi Rama hoqi fashat e çmimit që favorizonin familjet, sidomos ato të varfra.

Më 2021 Rama foli për shtrenjtim të çmimit të energjisë, por disa muaj më pas u tërhoq nga ai projekt.

Në Shqipëri, ndryshe nga vendet e tjera në Bashkimin Evropian, shitja e energjisë për familjarët është e centralizuar duke i lënë monopolin një kompanie, aktualisht shtetërore.

Kjo bën të pamundur konkurrencën dhe ofrimin e shërbimit më cilësor siç ndodh në fqinjët Greqi e Itali ku abonentët zgjedhin mes disa kompanive që japin oferta nga më nxitëset.

/noa.al