Michail Antonio ka dërguar një mesazh për tifozët e klubit të Premier League pasi doli nga spitali, ndërsa vazhdon rikuperimin e tij. Ai pësoi një aksident të rëndë automobilistik në fillim të dhjetorit. "Gëzuar Vitin e Ri, së shpejti do të kthehem në fushë", – shkroi sulmuesi i West Ham-it përmes një mesazhi të publikuar nga klubi në faqen zyrtare dhe rrjetet sociale të lojtarit.

Sulmuesi 34-vjeçar xhamajkan iu nënshtrua një operacioni për fraktura në gjymtyrën e poshtme, pas një aksidenti jashtë Londrës, më 7 dhjetor. Ai pritet të përballet me një periudhë të gjatë rehabilitimi. Antonio deklaroi: "Këtij viti që po ikën e di saktësisht për çfarë i jam mirënjohës: që mbeta gjallë".

Ja mesazhi i plotë në rrjetet sociale i Antonio: "Çdo vit, në këtë periudhë, më pyesin për çfarë jam mirënjohës, dhe çdo vit është e vështirë të gjej fjalët e duhura. Por këtë vit e di saktësisht për çfarë jam mirënjohës: që jam gjallë. Kam kaluar kaq shumë vite duke e marrë jetën si të mirëqenë, duke bërë plane për të nesërmen, ose vitin tjetër, gjithmonë duke supozuar se e nesërmja ishte e garantuar.

Kam parë miq që kanë humbur jetën, kam parë të tjerë që kanë kaluar përvoja afër vdekjes. Madje edhe në ato momente nuk e kuptoja plotësisht sa e çmuar është jeta. Ajo që kam përjetuar së fundi më ka hapur sytë. Jeta është e brishtë dhe çdo moment i vetëm i saj ka rëndësi.

I jam jashtëzakonisht mirënjohës Zotit që më dha forcën për të vazhduar dhe më lejoi të jem ende këtu. Një falënderim i madh për mjekët, spitalin dhe të gjithë te West Ham: ekipi mjekësor, drejtuesit, stafi, shokët e ekipit dhe tifozët fantastikë. Nuk do t’ia kisha dalë pa ju. Për të dashurit e mi, që kanë qenë pranë meje: nuk mund ta shpreh dot sa të rëndësishëm jeni për mua.

Së fundi, për të gjithë komunitetin e futbollit: faleminderit për gjithë dashurinë dhe mbështetjen që më keni treguar. Ka pasur një kuptim të jashtëzakonshëm për mua. Ju dua të gjithëve dhe jam pafundësisht mirënjohës. Gëzuar Vitin e Ri dhe shihemi së shpejti në fushë".