Roma po mendon jo vetëm për të tashmen, por edhe të ardhmen. Familja “Friedkin” nuk ka ndërmend të largohet nga klubi verdhekuq; përkundrazi, synon ta rilançojnë atë. Ndërsa trajneri aktual është Claudio Ranieri, e ardhmja e stolit mbetet një çështje për t’u vendosur. Presidenca është e përfshirë në të gjitha vendimet kryesore të klubit dhe synon të afrohet më shumë me tifozët romanistë, jo nesër, por sot.

Një nga prioritetet kryesore për të ardhmen është zgjedhja e trajnerit që do të pasojë Ranierin. Nuk është vetëm Massimiliano Allegri, që ndodhet në mendjet e drejtuesve të klubit. Sipas “Corriere dello Sport”, ekziston edhe mundësia që Davide Ancelotti, djali i trajnerit të famshëm Carlo Ancelotti, të marrë stolin e skuadrës kryeqytetase. Babai i tij, një nga trajnerët më të suksesshëm në historinë e futbollit dhe një figurë që ka lidhje të veçantë emocionale me Romën, e ka dhënë këtë këshillë.

Sigurisht, Davide Ancelotti nuk ka të njëjtën eksperiencë dhe “palmares” si Allegri, por puna e tij si ndihmës-trajner te Real Madridi, në kontakt të përditshëm me lojtarët më të mirë në botë, i ka dhënë përvojë dhe perspektivë. “Friedkins” po e shohin këtë mundësi si një mënyrë për të sjellë freski dhe ambicie në projektin e Romës, diçka që synojnë ta rikthejnë në klub.

Për Carlo Ancelottin, ideja që Davide të drejtojë një ditë Romën është një ëndërr personale. Ndërkohë që spekulimet vazhdojnë, vendimi për trajnerin e ri verdhekuq mund të jetë një pikë kthese për të ardhmen e klubit dhe raportin e tij me tifozët.