Kylian Mbappé ka përshkruar momentin kur humbi një penallti kundër Athletic Bilbao më herët, gjatë këtij muaji, duke e quajtur atë si periudhën kur ka ndjerë se kishte prekur "fundin e botës". Ndërsa po luftonte për t’u përshtatur me ambientin e ri te Real Madridi, ai tha se e përdori këtë zhgënjim për t’u shkundur dhe nxitur rikthimin e tij në top-formë.

Mbappé la PSG-në gjatë verës si shënuesi më i mirë i të gjitha kohërave në atë klub, por kalimi te Real Madridi ka hasur në mjaft vështirësi, përfshirë disa probleme me lëndime. Të gjitha këto pengesa e ngadalësuan procesin e aklimatizimit të tij te “mbretërorët” madrilenë.

Megjithatë, pas humbjes së dy penalltive radhazi brenda një jave, njëra prej të cilave në disfatën 2-1 në Bilbao, e cila e shkundi përfundimisht yllin francez, Mbappé ka arritur të shënojë 4 gola në të gjitha kompeticionet. Më i fundit u realizua dje, goli i parë i fitores 4-2 ndaj Sevilla në La Liga.

Duke folur për mikrofonët e “Real Madrid TV”, 26-veçari transalpin, fitues i Kupës së Botës më 2018, tha: "Mora shumë shtysa pozitive nga ndeshja e Bilbaos. Në atë transfertë kujtova se preka ‘fundin e botës’, sidomos ngaqë humba edhe një penallti. Sidoqoftë, në atë moment kuptova se duhet të jepja gjithçka për këtë fanellë dhe të luaja me personalitet".

Tani, Mbappé ka shënuar 10 gola në 16 ndeshje të La Liga-s dhe e ka ndihmuar Real Madridin ta mbyllë vitin 2024 në vendin e dytë të renditjes së La Liga-s, vetëm një pikë pas liderëve të Atletico Madridit. Lidhur me vazhdimësinë te “Los Blancos”, francezi u shpreh optimist:

"Mund të shënoj shumë më tepër gola për Real Madridin, e di që kam shumë për të dhënë. Ndeshjet e fundit kam luajtur më mirë. Tani e njoh më mirë ekipin dhe kjo ka ndryshuar shumë gjëra. Siç thotë trajneri Ancelotti, periudha e aklimatizimit tim këtu ka mbaruar. Ndihem shumë komod në ekip dhe luaj më mirë me të tjerët në fushë".