"Jam shumë i lumtur që mësova për praninë e rreth 45.000 grave dhe vajzave në stadiumin e Isfahanit për ndeshjen e kampionatit iranian mes Sepahan dhe Persepolis në fillim të kësaj jave". Kështu u shpreh në rrjetet sociale presidenti i FIFA-s, Gianni Infantino, duke komentuar atë që ndodhi pas vendimit të Komisionit Disiplinor të Federatës Iraniane të Futbollit për të ndaluar hyrjen e burrave në stadium për shkak të trazirave që ndodhën pas një ndeshjeje mes këtyre dy skuadrave, të cilat janë rivale të ashpra.

"FIFA ka qenë në kontakt prej vitesh me autoritetet iraniane lidhur me mundësinë që gratë të marrin pjesë në ndeshjet e futbollit, – vijon Infantino. – Pas derbit të Teheranit vitin e kaluar mes Persepolis dhe Esteghlal, ku morën pjesë 3.000 gra, ky zhvillim i fundit është një përfaqësim i shkëlqyer i faktit se futbolli është gjithëpërfshirës dhe i hapur për të gjithë.

Do të doja të shprehja mirënjohjen time të sinqertë për të gjithë ata që e bënë të mundur këtë, përfshirë autoritetet lokale dhe kolegët tanë të Federatës Iraniane të Futbollit, të udhëhequr nga presidenti Mehdi Taj. Kam ndërmend ta vizitoj së shpejti Iranin për të diskutuar më tej çështjet e lidhura me futbollin, pasi ky vend është një forcë e rëndësishme në futbollin aziatik. Pra është e rëndësishme të vazhdojmë të kultivojmë marrëdhënien pozitive dhe të frytshme të punës që kemi ndërtuar".