GJERMANIA- Drejtuesi i një automjeti përplasi një turmë të madhe njerëzish në një treg Krishtlindjesh në Gjermaninë qendrore të premten në mbrëmje, duke vrarë të paktën dy persona dhe duke plagosur më shumë se 60 të tjerë. Mediat e huaja bëjnë me dije se drejteusi ishte një mjek 50-vjeçar nga Arabia Saudite me vendbanim në Gjermani, ku kishte jetuar për gati dy dekada. Mësohet po ashtu se agresori 50-vjeçare është arrestuar.

Një nga të vdekurit ishte një fëmijë i vogël, tha Reiner Haseloff, Kryeministri i shtetit të Saksoni-Anhalt.

“Është një katastrofë për qytetin e Magdeburgut, për shtetin dhe për Gjermaninë në përgjithësi. Siç qëndrojnë gjërat për momentin, ne po flasim për një shkelës të vetëm, që do të thotë se nuk ka asnjë rrezik të mëtejshëm për qytetin, sepse ne mundëm ta arrestonim", tha Haseloff, duke shtuar se numri i viktimave mund të rritet.

Motivi i sulmit vijon të mbetet i paqartë. Një operacion policor u zhvillua gjithashtu në qytetin e Bernburgut, në jug të Magdeburgut, ku i dyshuari besohet të ketë jetuar, raportoi gazeta lokale Mitteldeutsche Zeitung.

Një burim nga Arabia Saudite tha për Reuters se mbretëria kishte paralajmëruar autoritetet gjermane për sulmuesin, pasi kishte postuar pikëpamje ekstremiste në llogarinë e tij personale X. Burimi e identifikoi të dyshuarin si Taleb Abdul Jawad. Der Spiegel i Gjermanisë e identifikoi sulmuesin si Taleb A., një specialist në psikiatri dhe psikoterapi që simpatizonte partinë e ekstremit të djathtë të Gjermanisë Alternativa për Gjermaninë.

Kancelari gjerman Olaf Scholz, pritet të vizitojë vendin e ngjarjes të shtunën me ministren e Brendshme Nancy Faeser. Ndërsa lajmi për sulmin u përhap, Elon Musk, miliarderi aleat me Presidentin e zgjedhur të SHBA-së, Donald Trump, kritikoi Scholz dhe i bëri thirrje të jepte dorëheqjen.