Një nga nxënësit e shkollës “Fan Noli”, i cili ka qenë në vendin ku ndodhi sherri që i mori jetën 14 vjeçarit Martin Cani, ka tentuar t’i japë fund jetës.

E ftuar në emisionin “Opinion”, gazetarja Klodiana Lala tha se duhet treguar shumë kujdes në lidhje me ngjarje të tilla ku përfshihen fëmijë, sepse deklaratat e nxituara apo përfolja e të miturve në media, mund të shkaktojë rëndë të madhe psikologjike tek ta.

“Njëri nga fëmijët ka tentuar të vrasë veten pas kësaj ngjarje”, tha gazetarja. Klodiana Lala u bëri thirrje dhe autoriteteve që të zbardhin të vërtetën.

“Autoritetet duhet të zbardhin të vërtetën, se pati një gjuhë të papranueshme në deklaratat për shtyp. Mënyra sesi Policia reagoi i hodhi benzinë zjarrit.”

Kujtojmë se ngjarja e rëndë u regjistrua pak pas mesditës së 18 nëntorit, në afërsi të shkollës “Fan Noli” në Tiranë.

14-vjeçari Mario Përlleshaj goditi me thikë në zemër bashkëmoshatarin e tij, Martin Cani i cili fatkeqësisht humbi jetën si pasojë e plagëve të marra.

Ndërkohë, i plagosur në këtë ngjarje mbeti dhe shoku i tij, Luis Meçja.

Ky i fundit qëndroi për gati 11 ditë në Spitalin e Traumës në Tiranë dhe më pas u nis drejt Italisë për ndihmë më të specializuar.