A është karriera si futbollist e Karim Benzema drejt përfundimit? Sipas informacioneve të publikuara nga “Relevo”, sulmuesi francez 36-vjeçar, i cili luan për Al Ittihad, është gati të tërhiqet një vit përpara skadimit të kontratës.

Pra, jo në vitin 2026, kur skadon kontrata e tij me klubin saudit, por më 2025. Sipas raportimeve, ish-lojtari i Real Madridit është i lodhur nga rutina e përditshme në një ekip me më shumë dështime sesa trofe, sidomos pas sezonit të kaluar nën drejtimin e Marcelo Gallardo.

Nën drejtimin e Laurent Blanc, situata është krejt ndryshe, pasi Benzema është golashënuesi i dytë më i mirë i “Saudi Pro League” (10 gola), pas Aleksandar Mitrovic (12), dhe Al Ittihad kryeson kampionatin.

Vendimi për ta përfunduar karrierën nuk ka të bëjë me problemet fizike, por pozicioni i Al Ittihad ngre pikëpyetje, pasi klubi është i gatshëm të heqë dorë nga francezi për shkak të kostos së lartë të pagës së tij (100 milionë euro në vit).

Benzema, fitues i “Topit të Artë” më 2022, në moshën 36-vjeçare ka tashmë një projekt për të ardhmen. Atij pritet t’i besohet roli i ambasadorit të Real Madridit jashtë vendit, veçanërisht në botën arabe. Sipas “Relevo”, sulmuesi francez ka ruajtur marrëdhënie të shkëlqyera me presidentin e klubit spanjoll, Florentino Perez, i cili kishte një rol kyç në transferimin e tij nga Lyon në vitin 2009.